Enfans, oyez une leçon :
Nostre langue a ceste facon,
Que le terme, qui va devant,
Voulentiers regist le suivant.
Les Vieilz Exemples ie suivray
Pour le mieulx : car, a dire vray,
La Chancon fut bien ordonnée,
Qui dit, m'amour vous ay donnée :
Voyla la force, que possède
Le Féminin, quand il précede.
Or prouveray, par bons Tesmoings,
Que tous Pluriers n'en font pas moins :
Il fault dire en termes parfaictz,
Dieu en ce Monde nous a faictz :
Fault dire en parolles parfaictes,
Dieu en ce Monde, les a faictes,
Et ne fault point dire (en effect)
Dieu en ce Monde, les a faict :
Ne nous a faict, pareillement :
Mais nous a faictz, tout rondement.